Ish-sulmuesi i Hajvalisë së Prishtinës në kohën kur udhëhiqej nga trajneri Ismet Munishi, Sergio Junior, i njohur ndryshe si Serxhinjo, ka bërë hapin e madh në karrierën e tij, duke u transferuar te skuadra e Vasko de Gamës në elitën e futbollit brazilian.
28-vjeçari ka qenë pjesë edhe e klubit të Skendërbeut në Shqipëri, por nuk mundi të lerë gjurmë në elitën e futbollit shqiptar.
Më pas braziliani u transferua në kampionatin maqedonas te Rabotniçki dhe Shkupi, teksa hapin e rëndësishëm në karrierë e bëri në sezonin 2020/2021, kur iu bashkua turqve të Giresunsport.
Tek kjo skuadër sulmuesi qëndroi 3 sezone, ndërkohë që ditën e sotme firmosi te klubi prestigjioz brazilian Vasko de Gama, që numëron plot 8 trofe të fituara, teksa spikasin 4 kampionatet, 1 Kupë Sudamerikane dhe 1 Kupë Libertadores.