Një video e rëndë është publikuar nga një kamionist që ndodhej pranë vendit ku ndodhi aksidenti fatal i futbollistit të Liverpool-it, Diogo Jota.
Në pamje, shihet makina luksoze e llojit Lamborghini duke u përfshirë nga flakët, vetëm pak minuta pas përplasjes së rëndë që i mori jetën yllit portugez dhe vëllait të tij.
Sipas mediave spanjolle, aksidenti ndodhi në orët e para të mëngjesit të së enjtes, rreth orës 00:30, në afërsi të qytetit Cernadilla në veriperëndim të Spanjës. Dyshohet se mjeti ka pësuar një defekt në një nga gomat gjatë një parakalimi me shpejtësi të madhe, gjë që ka çuar në humbjen e kontrollit, përmbysjen e makinës dhe më pas shpërthimin në flakë.
Pavarësisht përpjekjeve të kalimtarëve për ndihmë, për Jotën dhe vëllain e tij nuk pati shpëtim. Të dy ndërruan jetë në vendin e ngjarjes, duke lënë pas një dhimbje të thellë te familja, miqtë, bota e futbollit dhe miliona tifozë në mbarë botën.
Diogo Jota, 27-vjeçar, ishte një nga emrat më të dashur te Liverpool dhe përfaqësuesja portugeze, i njohur për përkushtimin dhe shpirtin luftarak në fushë. Vdekja e tij e parakohshme ka sjellë një valë reagimesh e homazhe nga kolegët dhe klubet e mëdha evropiane.