Këngëtari i njohur anglez, Ed Sheeran, ka blerë aksione në klubin ku bën pjesë edhe portieri i Kosovës, Arijanet Muriq, Ipswich Town. Këtë e ka bërë të ditur Ed Sheeran në rrjetet sociale. Ai ka blerë 1.4 për qind të aksioneve te skuadra angleze.
“Jam i emocionuar dhe ju njoftoj se kam blerë një përqindje të vogël të aksioneve të klubit të qytetit të lindjes, Ipswich Town. Është ëndrra e çdo tifozi të jetë pronar në klubin që ata mbështesin dhe ndihem shumë mirënjohës për mundësinë. Kam jetuar në Suffolk që kur isha trevjeçar dhe megjithëse kam udhëtuar nëpër botë, ndonjëherë ndihem si i huaj në qytetet e mëdha. Suffolk dhe Ipswich gjithmonë më kanë bërë të ndihem si në shtëpi. Është gëzim i madh të jesh një tifoz i Ipswich Town”, ka deklaruar Ed Sheeran, shkruan të premten “Reuters”. Ipswich Town në edicionin 2024/2025 do të bëjë gara në Premier League.