Juventusi e Borussia Dortmundi kanë luajtur ndeshje të zjarrtë të martën mbrëma. Dhe spektakli me plot tetë gola nuk dha fitues.
Juve e Dortmundi u përballën në Torino, në kuadër të xhiros së parë të fazës së ligës në Champions. Te Juventusi në këtë superndeshje debutoi Edon Zhegrova. Për sulmuesin e Kosovës është paraqitja e parë që nga 15 dhjetori i vitit të kaluar. Në fund të afatit kalimtar veror, Zhegrova kaloi nga Lille te gjiganti italian.
Zhegrova u aktivizua në minutën e 87-të, në vend të Kenan Yildizit. Rezultati ishte 4:2 për Dortmundin dhe shumica e njerëzve menduan se çështja e fituesit ishte zgjedhur.
Por Zhegrova dha kontribut që rezultati në fund të jetë 4:4. Ylli i Kosovës ishte pjesë e aksionit të golit të fundit, të shënuar nga Juventusi në minutën e gjashtë shtesë.
Lloyd Kelly shënoi golin e festës së madhe në Torino. Juventusi e ngushtoi rezultatin në 4:3 në minutën e 94-t, kur shënoi Dushan Vlahoviq. I njëjti lojtar asistoi për 4:4.
Ishte fund i shkëlqyer i një spektakli plot gola.
Të gjithë tetë golat u shënuan në pjesën e dytë. Dhe secili gol ishte më i mirë se tjetri.
Karim Adeyemi e kaloi në epërsi 1:0 Dortmundin në minutën e 52-të. Pasuan tre gola shumë të shpejtë.
Kenan Yildiz shënoi supergol për 1:1 në minutën e 63-të. Menjëherë në minutën e 65-të Dortmundi e ktheu epërsinë 2:1. Felix Nmecha shënoi me asistim të Adeyemit.
Por gol u shënua edhe në portën tjetër, menjëherë në minutën e 67-të. Yildizi asistoi për rezervistin Dushan Vlahoviq, që shënoi për 2:2.
Yan Couto shënoi për 3:2 në të mirë të Dortmundit në minutën e 74-t. Më pas gjermanët fituan penallti, të cilën në gol e shndërroi Ramy Bensebaini në minutën e 86-t.
Pasoi aktivizimi i Zhegrovës dhe episodi i fundit i dramës.
Zhegrova ishte shumë aktiv, ndonëse luajti pak. E mori përgjegjësinë në krahun e djathtë, duke qenë i rrezikshëm për mbrojtjen e Dortmundit.
Më shumë minuta priten për Zhegrovën në ndeshjet e ardhshme të Juventusit. Sinjalet e tij të para ishin pozitive.