Zhvillime të reja rreth Edon Zhegrovës, sulmuesit të Kosovës, ka pasur të premten. Dhe për të ardhmen shumë të paqartë për sulmuesin e krahut, në konferencë për shtyp të premten ka folur presidenti i Lillet, Olivier Letang.
Ai ka deklaruar se 26-vjeçari mund të mbetet te Lille edhe për një edicion, kur edhe i skadon kontrata.
“Është e mundur që ai të qëndrojë me ne. Është e mundur që ai t’i nis stërvitjet të hënën dhe të mund të llogarisim në të në sezonin e ri”, ka deklaruar Letang.
“Ai është pjesë e skuadrës. E kemi konsideruar largimin e tij në një pikë, por mendoj se kushtet nuk janë të duhura që ai të mund të largohet”.
Lille për shërbimet e Zhegrovës i ka kërkuar deri në 20 milionë euro, por asnjë skuadër nuk e ka plotësuar kërkesën e skuadrës franceze.
“Pse të gjejmë lojtar të ri. Ai është këtu, është në shtëpi, po bën mirë dhe është i etur për suksese. Kemi folur për këtë. Marrëveshja me të është që nëse kthehet në ekipin e parë, ai do të luajë për ne në sezonin tjetër”, theksoi Letang.
Mediumet franceze kanë shkruar se në garë për Zhegrovën së fundmi ka qenë edhe skuadra tjetër e njohur franceze, Marseille. “Nuk kam pasur kontakt me asnjë klub francez për Edonin”, ka përfunduar Letang.