Egnatia është shpallur kampione e Shqipërisë për herë të dytë radhazi, duke mbrojtur me sukses titullin në Kategorinë Superiore pas një fitoreje bindëse ndaj Vllaznisë në finalen e madhe 4-0.
Finalja u zhvillua në “Arenën Kombëtare” dhe u drejtua nga gjyqtari i njohur polak i FIFA-s, Szymon Marciniak. Rrogozhinasit e nisën ndeshjen në mënyrë ideale, duke kaluar në avantazh që në minutën e 6-të me golin e Regi Lushkjës.
Vllaznia tentoi të reagojë, por në fillimin e pjesës së dytë ishte sërish Lushkja që shënoi për të dyfishuar rezultatin në minutën e 49-të, duke i dhënë një tjetër goditje skuadrës shkodrane.
Egnatia menaxhoi mirë lojën në vazhdim dhe në minutën e 83-të, Leo Melo – vetëm shtatë minuta pasi ishte futur në fushë – shënoi golin e tretë, duke mbyllur praktikisht çdo dilemë për fituesin.
Në sekondat e fundit të sfidës, Ujka vendosi vulën me golin e katërt, duke kompletuar një “poker” historik për Egnatian në këtë finale.
Ky sukses vulos një sezon fantastik për rrogozhinasit, që përveç ruajtjes së vendit të parë në renditjen e përgjithshme, nuk gabuan as në fazën “Final 4”.
Nga ana tjetër, ëndrra 24-vjeçare e Vllaznisë për të rikthyer titullin në Shkodër mbetet sërish pezull, me shkodranët që largohen të zhgënjyer nga një tjetër tentativë e dështuar.