Ermal Krasniqi ka debutuar në mënyrë të shkëlqyeshme te Cluji.
Sulmuesi kosovar ishte më meritori në fitoren që Cluji e shënoi sonte në udhëtim kundër Farul Constanta, në kuadër të javës së 22-të në elitën e futbollit rumun.
Kjo ndeshje u mbyll me fitoren e pastër 0:3 të skuadrës së udhëhequr nga Dan Petrescu.
Krasniqi ishte autor i golit të parë të shënuar në minutën e 49-të, teksa asistoi te goli i tretë i ndeshjes, që u shënua nga Claudiu Petrila në minutën e 77-të.
Autor i golit të tjetër ishte Cristian Manea, i cili shënoi nga pika e penalltisë në minutën e 59-të.
Ermal Krasniqi ishte titullar në këtë ndeshje dhe luajti për 89 minuta.
Cluji pas kësaj fitore ka 47 pikë dhe tani renditet në pozitën e parë në tabelë, me dy pikë më shumë se kundërshtari i sotëm, Farul Constanta.