FC 2 Korriku do të hyjë direkt në raundin e dytë të “Domestic Champions Path” në edicionin 2025/26 të UEFA Youth League, duke shënuar një tjetër moment historik për klubin dhe për futbollin e Kosovës në përgjithësi.
Lajmi është konfirmuar paraditen e sotme nga vetë organet e UEFA-s, përmes publikimit të listës së përditësuar të aksesit (“Access List 2025-26”), ku FC 2 Korriku zë vendin ndër skuadrat që nisin garat nga faza e dytë – një njohje e qartë për suksesin dhe paraqitjen mbresëlënëse në sezonin e kaluar.
Kampionët e rinj të Kosovës, të cilët debutuan vitin e kaluar në këtë kompeticion prestigjioz, arritën të kalojnë dy raunde të vështira të “Domestic Champions Path”, duke tërhequr vëmendjen e opinionit futbollistik evropian për organizimin dhe talentin e tyre.
Aventura e re evropiane për 2 Korrikun do të nis më 22 tetor 2025, kur zhvillohet ndeshja e parë zyrtare e raundit të dytë.
Ndërkohë, shorti për edicionin e ri do të hidhet më 3 shtator në Nyon të Zvicrës, ku pritet të mësohet kundërshtari i radhës i skuadrës nga Prishtina.
Ky lajm përforcon edhe më shumë pozitën e klubeve kosovare në garat ndërkombëtare të UEFA-s, ndërsa për FC 2 Korrikun përbën një motiv shtesë për të vazhduar rrugëtimin ambicioz në zhvillimin e talenteve të rinj.