Një gol i shënuar në pjesën e parë nga Leotrim Kryeziu dhe një tjetër në pjesën e dytë nga Endrit Krasniqi, kanë mjaftuar që Prishtina të marrë pikët e plota në derbin ndaj Llapit.
Prishtina të shtunën në kuadër të xhiros së 13-të të Superligës së Kosovës në futboll, mposhti llapjanët në stadiumin “Fadil Vokrri” në kryeqytet, me rezultatin 2:0.
“Bardhekaltrit” patën më shumë nga loja në pjesën e parë.
Në fillim të ndeshjes, pas harkimit të Gledi Micit të Prishtinës nga e majta, topi qëlloi shtyllën pas reagimit të portierit të Llapit, Ilir Avdyli.
Prishtinës për pozitë jashtë loje iu anulua një gol i shënuar nga Kreshnik Uka në minutën e 11-të.
Menjëherë në aksionin vijues, rastin më të mirë për Llapin e pati Francisco Rivera, i cili nuk arriti ta mposhtë portierin e Prishtinës, Ardit Nika. Nika e priti tentimin e meksikanit.
Në minutën e 25-të, Uka ishte sërish në rast të mirë shënimi, por gjuajti mbi portë.
Ndërkohë, në minutën e 37-të, Uka u shndërrua në asistues për Kryeziun që shënoi nga afërsia me gjuajtje të fuqishme.
Rastet për të shënuar gola nuk munguan nga të dyja ekipet as në pjesën e dytë, por ishin kryeqytetasit ata që iu gëzuan golit të dytë dhe të qetësisë.
Kryeziu fillimisht në minutën e 84-t qëlloi transversalen, ndërsa dy minuta më pas, Endrit Krasniqi nuk gaboi nga afërsia pas asistimit të Ukës.
Për Prishtinën ishte fitorja e tretë rresht. Mposhti Ferizajn, më pas në mesjavë fitoi te Drita në udhëtim. Llapi nuk luajti në mesjavë, për shkak se zhvilloi ndeshjen e Superkupës “Kosovë-Diasporë”, të cilën e fitoi 3:1.
Pas 12 ndeshjeve të luajtura, Prishtina forcohet në pozitën e tretë me 21 pikë.
Llapi mbetet me 13 pikë në 11 ndeshje në pozitën e gjashtë.
Në xhiron e 14-të, Prishtina luan në udhëtim te Ballkani, ndërsa Llapi e pret Dritën.