Lamine Yamal mbush 17 vjeç dhe tashmë pritet një takim me historinë. Të dielën në mbrëmje, ylli i ri i Barcelonës do të ketë shansin të ngrejë në qiell trofeun e Euro 2024 në finalen e Berlinit kundër Anglisë.
Spanja u kualifikua për në finale, falë golit të tij kryevepër kundër Francës në gjysmëfinale: “I thashë mamasë sime, se nëse fitojmë nuk dua asgjë si dhuratë, – ishin fjalët e tij për Marca në ditëlindjen e tij, – kërkoj vetëm të jem në gjendje të festoj fitoren në Madrid, me shokët e mi të skuadrës, duke u çmendur nga gëzimi për të na pritur në aeroport.”
Për Yamal është mundësia e parë e madhe e një karriere që sapo ka nisur. Lista e tij përfshin La Liga 2022/23, por në atë sezon ai luajti vetëm 7 minuta, ato të debutimit të tij zyrtar me fanelën e Barçës. Tani, është shansi për një triumf si protagonist absolut: “Duhet të vazhdojmë siç bëmë kundër Gjermanisë ose Francës. Të qëndrojmë vetvetja, të mbajmë topin për të kontrolluar lojën në çdo moment. Besoj se jemi më të mirët në këtë aspekt. Nëse nuk na ndalojnë do të kemi sukses, mendoj që nuk ka skuadër më të mirë sa Spanja”.
Kombëtarja e De La Fuentes shembi skepticizmin e shumëkujt me paraqitje të nivelit më të lartë: “Që përpara Kampionatit Evropian kemi thënë se meritonim besimin dhe se mund të ishim ndër favoritët, edhe nëse njerëzit nuk e mendonin kështu. U tha se ne nuk do të arrijmë në pesëshen më të mire. U desh pak kohë, por kushdo që do të hyjë në garë ndaj nesh do të jetë i mirëpritur”.
Yamal foli edhe për lidhjen e tij me të kaluarën: “Futbolli im vjen nga rruga, nga loja me miqtë. Kjo gjithashtu vjen nga shikimi në një drejtim dhe pasimi i topit në anën tjetër. Më thanë se në rrugën time, në Mataró, të gjithë thërrisnin emrin tim. Disa do të vijnë në Berlin, por të tjerët nuk do të munden. Do të përpiqem të sjell vetë sa më shumë”.
Së fundi, ai shpjegoi marrëdhënien e tij me lojtarët më me përvojë dhe më të njohur , si brenda kombëtares spanjole, ashtu edhe jashtë saj: “Të gjithë më trajtojnë shumë mirë, jo si një fëmijë 16, 17 vjeç, por si dikush më të madh”.