Kanë përfunduar tre sfidat e para të xhiros së 24-të në Albi Mall Superligën e Kosovës.
Ferizaji ka arritur fitore të madhe ndaj Llapit me rezultat 2-1.
Ishin mysafirët të cilët kaluan të parët në epërsi me golin e Gerhard Prognit në minutën e 11-të. Ferizaj barazoi shifrat në minutën e fundit të pjesës së parë kur Edon Sadriu realizoi një gol të bukur për 1-1.
Edon Sadriu ishte hero i vendasve, kur në minutën e 59-të shënoi pas një asistimi të bukur nga Betim Haxhimusa për 2-1. Fitore të madhe ka realizuar edhe Dukagjini që ka mposhtur në udhëtim Malishevën me rezultat 1-2.
Khomutov dhe Marcelei Santos realizuan golat për skuadrën klinase, ndërkohë Bihorac ishte shënuesi i vetëm për Malishevën. Tre pikë të mëdha në udhëtim i ka arkëtuar edhe Trepça ’89 që ka mposhtur Drenicën me rikthim 1-2.
Da Silva kaloi i pari vendasit në epërsi me golin në minutën e shtatë, derisa rezultati u barazua në minutën e 32-të me autogolin që realizoi Shkëlzen Lushtaku 1-1. Golin e fitores për skuadrën mitrovicase e shënoi Rilind Nimani në minutën e 56-të nga gjuajtja e lirë.