FC Ferizaj ka reaguar pas deklaratës së publikuar nga KF Prishtina e Re lidhur me pretendime për fyerje me bazë racore gjatë ndeshjes së sotme, duke i hedhur poshtë kategorikisht këto akuza.
Në reagimin zyrtar, klubi nga Ferizaj i ka cilësuar pretendimet si të pavërteta dhe të pabazuara, duke theksuar se kapiteni i skuadrës, Betim Haxhimusa, është sportist me integritet të lartë dhe se një veprim i tillë nuk përfaqëson karakterin apo vlerat e tij.
“FC Ferizaj është klub që ndërtohet mbi respektin dhe barazinë. Në skuadrën tonë bëjnë pjesë lojtarë nga prejardhje të ndryshme, përfshirë edhe lojtarë me ngjyrë, të cilët janë pjesë e pandashme e familjes sonë sportive. Kjo dëshmon qartë frymën dhe vlerat që përfaqësojmë”, thuhet në reagim.
Klubi e ka konsideruar të nxituar dhe të turpshme komunikatën e publikuar nga KF Prishtina e Re, duke nënvizuar se ajo është bërë pa asnjë bazë faktike. Sipas FC Ferizaj, në momentin e pretenduar ka qenë shumë pranë situatës edhe referi Nuza, çka, sipas tyre, e bën akuzën edhe më të pabazuar.
Në fund, FC Ferizaj ka theksuar përkushtimin ndaj parimeve të fair-play, respektit dhe dinjitetit, duke shtuar se nuk do të lejojë që emri i klubit dhe i kapitenit të njolloset nga pretendime që i konsideron të pavërteta.