Pas Interit vjen Juventusi. Monzën e pret një tjetër përballje e vështirë, por tashmë në Kupën e Italisë, sfidë që do zhvillohet të enjtën e ardhshme (19 janar) dhe do transmetohet në SuperSport.
Adriano Galliani e shijoi në stilin e tij golin e barazimit ndaj Interit (2-2). Drejtuesi legjendar italian, zemra e të cilit është e ndarë mes Milanit dhe Monzës, skuadrës së qytetit ku ka lindur, është gati të përjetojë të tjera emocione ndaj bardhezinjve të Allegrit.
“Do të jepja jetën për Monzën, ky është shkaku pse ‘çmendem’ gjatë festimit të golave. Jemi të kënaqur me rrugëtimin në kampionat. Tani na pret Juventusi në Kupë.
Nuk i dihet se çfarë mund të ndodhë në atë ndeshje… Ruaj ende kontakte me gjithë trajnerët që kanë punuar këtu. Berlusconit do i jem mirënjohës gjatë gjithë jetës për atë që ka bërë për këtë klub”, u shpreh Galliani.
Monza siguroi sezonin e kaluar ngjitjen në Serie A, për herë të parë në historinë e klubit 111-vjeçar. Ekipi renditet përkohësisht në vendin e 15-të me 18 pikë, nëntë mbi zonën e ftohtë.