Federata e Futbollit të Kosovës e ka lavdëruar paraqitjen e mbrëmshme të yllit të kombëtares së Kosovës, Edon Zhegrova, me ekipin e tij Lille.
Zhegrova ishte në mesin e golashënuesve, ndërsa ai me shokë mposhtën Atletico Madridin në Ligën e Kampionëve me rezultat 3-1 si mysafirë.
Ndërkaq, FFK-ja i ka nxjerrë statistikat e tij për këtë ndeshje.
“Forma fenomenale e futbollistit të Kombëtares së Kosovës, Edon Zhegrova, nuk ka të ndalur. Ai triumfoi mbrëmë në përballjen e ekipit të tij, LOSC Lille, kundër Atletico Madridit, në kuadër të garës më të madhe të klubeve, Ligës së Kampionëve, të cilën e fituan me rezultat 1:3”.
“Zhegrovës në këtë ndeshje i mjaftuan vetëm 74 minuta dhe 35 prekje me topin për të pasur 88% saktësi në pasime dhe për të shënuar një gol fantastik”, shkroi FFK.
Goli i Zhegrovës ishte ai i barazimit, pas së cilit shokët e tij shënuan edhe dy herë deri në fund.