Futbolli kosovar sot ka mare një lajm të zi, pasi u nda nga jeta në moshë të re futbollisti Erjon Morina.
Ai kohë më parë kishte përjetuar një sulm gjatë stërvitjeve dhe gjendja e tij ishte keqësuar. Pas një luftë të gjatë ai humbi betejën dhe i dha lamtumirë kësaj bote.
Federata e Futbollit e Kosovës, ka ngushëlluar familjen Morina dhe gjithë komunitetin e futbollit për këtë humbje të madhe.
Postimi i FFK-së:
Telegram ngushëllimi për ndarjen nga jeta të Erjon Morinës
Prishtinë, 12 dhjetor 2024
E nderuar Familje Morina,
Të nderuar drejtues dhe staf i FC Vushtrria,
Me pikëllim të thellë e morëm lajmin për ndarjen nga jeta të birit tuaj të dashur, futbollistit të talentuar të FC Vushtrria, Erjon Morina.
Humbja e Erjonit na ka prekur thellë, jo vetëm si komunitet futbolli, por edhe si shoqëri.
Ikja e parakohshme nga kjo botë ka ndalur ëndrrat e tij rinore dhe karrierën e tij premtuese, duke lënë pas një boshllëk të madh në zemrat e të gjithë neve.
Erjoni ishte një futbollist me plot pasion – ai ishte një djalë shembullor dhe i përkushtuar për realizimin e ëndrrave të tij, por Perëndia e deshi më herët afër vetes.
Ndarja e tij na la të pikëlluar, por kujtimi për të mbetet i paharruar në zemrat e familjes, bashkëlojtarëve dhe gjithë komunitetit të futbollit në Kosovë.
Në këto momente të vështira, ju lutem pranoni ngushëllimet më të sinqerta në emrin tim personal, të Komitetit Ekzekutiv të FFK-së, të klubeve dhe të gjithë komunitetit të futbollit. Ne jemi pranë jush në këtë dhimbje të madhe.
I përjetshëm qoftë kujtimi për Erjonin!
Me respekt,
Agim Ademi
President i FFK-së