Sipas mediave serbe, FIFA po shqyrton mundësinë e një dënimi të ri ndaj Federatës së Futbollit të Serbisë, dhe kësaj radhe nuk do të jetë vetëm një kufizim i numrit të shikuesve, por stadiumi “Rajko Mitiq” në Beograd mund të mbyllet plotësisht për ndeshjen ndaj Shqipërisë.
Lajmin e ka raportuar të mërkurën gazeta serbe “Alo”. Ndeshja Serbi – Shqipëri është planifikuar të zhvillohet më 11 tetor në Beograd, në kuadër të kualifikimeve për Kupën e Botës 2026.
Sipas mediave serbe, dënimi i mundshëm lidhet me thirrjet “Kosova – Serbia” gjatë ndeshjes Serbi – Angli, e zhvilluar të martën mbrëma në Beograd, ku Anglia fitoi 5-0.
Madueke feston golin ndaj Serbisë
Gjithashtu, gjatë takimit u shpalosën flamuj të Serbisë mbi hartën e Kosovës, ndërsa kishte thirrje raciste ndaj mysafirëve.
Po ashtu, kishte momente, kur tifozët serb u rrahën mes vete, sidomos për brohoritjet pro dhe kundër, Aleksandar Vucic.
Federata e Futbollit të Serbisë është dënuar shpesh nga UEFA, kryesisht për thirrje dhe banerë me përmbajtje anti-Kosovë, dhe pikërisht në ndeshjen me Anglinë kishte të mbyllur disa sektor.
FIFA, po ashtu e kishte gjobitur edhe Federatën Shqiptare të Futbollit (FSHF) me 200 mijë dollarë (185 mijë euro) për shkak të sjelljes së papërshtatshme të tifozëve gjatë ndeshjes ndaj Serbisë, të cilën e vuajti ndaj Letonisë.