Fisnik Asllani do të jetë një nga emrat e rinj intrigues të merkatos së verës së ardhshme.
Sulmuesi kosovar e ka nisur mirë sezonin me Hoffenheim dhe klauzola e tij e përballueshme e largimit, midis 25 dhe 29 milionë euro, e bën atë një mundësi të
mirë në treg.
Barcelona është midis klubeve të interesuara, ndërsa Bayern Munih dhe Borussia Dortmund janë dy gjigantët gjermanë që kanë treguar më shumë interes për 23-vjeçarin.
Në një intervistë për ‘RTL’, Asllani tregoi se ndjek me vëmendje thashethemet për të ardhmen e tij, por aktualisht fokusohet te Hoffenheim: “Sigurisht që dëgjoj dhe lexoj gjëra të tilla. Është privilegj dhe ndihem pak krenar, por jam i përqendruar te Hoffenheim, në ndeshjet, javët dhe muajt e ardhshëm. Kjo është më e rëndësishmja për mua. Do të shohim çfarë ndodh në fund. Çdo gjë në kohën e duhur”.
Ai shtoi: “Sigurisht që flas për të ardhmen me familjen dhe miqtë e afërt. Nuk jam më 18 vjeç, ndaj duhet të planifikoj karrierën dhe jetën. Duhet të di deri ku dua të shkoj, çfarë dua, të njoh veten dhe të zbuloj çfarë është e rëndësishme për mua, cilat janë prioritetet e mia”. Për Asllanin, një “jetë e mirë” jashtë futbollit është po aq e rëndësishme, sepse “një gjë sjell tjetrën”.