Fushë Kosova ka shënuar fitore të madhe ndaj Lirisë në kuadër të xhiros së 13-të të elitës së futbollit të Kosovës.
Të dielën në stadiumin “Sami Kelmendi” në Lipjan, Fushë Kosova mposhti prizrenasit me rezultatin 2:0.
Ishte fitorja e parë pas tri ndeshjeve rresht për të udhëhequrit e trajnerit Burim Shala.
Për Fushë Kosovën ishte vetëm fitorja e dytë e edicionit aktual.
Qendërmbrojtësi Dominik Ivkiq pas një ore lojë i kaloi vendësit në epërsi. Për të ishte goli i katërt i edicionit.
Golin e dytë në minutën e 70-të e shënoi mesfushori Osman Mëziu.
Mëziu ishte i pagabueshëm përballë portierit kundërshtar dhe realizoi për fitoren e madhe të vendësve.
Fushë Kosova ngjitet në pozitën e nëntë dhe pas 13 ndeshjeve ka 10 pikë.
Liria bie në vendin e fundit me tetë pikë të mbledhura në total. Liria ka nëntë ndeshje pa fitore. Në këtë ecuri ka tri barazime e gjashtë disfata.
Në këtë edicion e ka vetëm një fitore, atë të xhiros së katërt, ndaj Fushë Kosovës.
Në xhiron e 14-të, Fushë Kosova luan në udhëtim te Drita, kurse Liria e pret Prishtinën.