Përfaqësuesja e Kosovës U17 është promovuar në Ligën A në kualifikimet për “Euro 2024” për futbolliste.
Kosova doli fituese e miniturneut kualifikues, i cili u mbajt në Prishtinë dhe Podujevë. Përfundoi e para në Grupin B1 të Ligës B, me 7 pikë të mbledhura pas tri ndeshjeve të zhvilluara. Në ndeshjen e fundit të grupit, të zhvilluar të hënën, Kosova ka triumfuar 2:1 ndaj Maqedonisë së Veriut.
Në ndeshjen e luajtur në stadiumin “Fadil Vokrri” në Prishtinë, Maqedonia e Veriut shënoi e para në minutën e 10-të, përpara se Rita Feka ta barazojë rezultatin në minutën e 27-të. Golin e fitores për Kosovën, e shënoi mesfushorja Liza Hoxha në minutën e 84-të.
Me këtë triumf, Kosova përfundoi e para në grup me 7 pikë, një më shumë se Maqedonia e Veriut që doli e dyta. Pjesë e këtij grupi ishin edhe Armenia e Gjeorgjia, që përfunduan në dy vendet e fundit në grup.
Në tri ndeshje të luajtura, Kosova regjistroi dy fitore dhe një barazim. Mposhti Maqedoninë e Veriut dhe Gjeorgjinë, ndërsa barazoi me Andorrën.