Kombëtarja e Kosovës në futsall ka barazuar në miqësoren e dytë me Letoninë. Ndeshja u luajt në qytetin e Ogres.
Kosova e Letonia të shtunën luajtën baras 3:3, ndonëse “Dardanët” patën epërsinë e dy golave deri në sekondat e fundit.
Ndeshjen e parë miqësore, Kosova të premten e fitoi me rezultatin 5:4 në një ndeshje shumë interesante.
Edhe më dramatik ishte dueli i së shtunës.
Mërgim Dervishaj nga afërsia e shënoi golin e vetëm për Kosovën në pjesën e parë, dhe me rezultatin 1:0, skuadrat shkuan në pushim.
Me të nisur pjesa e dytë, Kosova arriti t’i shënojë edhe dy gola tjerë.
Melos Kelmendi shënoi me gjuajtje të saktë nga distanca për 2:0, kurse Drilon Maxharraj realizoi për 3:0, pas një aksioni shumë mirë të ndërtuar, 17 minuta pa u mbyllur ndeshja.
Rikthimi i Letonisë nisi në 11-të minutat e fundit.
Fillimisht, Miks Babris e ngushtoi epërsinë në 3:1 pas një kundërsulmi të shpejtë.
Kapiteni Germans Matjushenko shënoi pas gabimit të portierit Bajram Ramadani, që tentoi të realizonte nga porta e tij.
Rezultati final 3:3 u vendos tre sekonda pa u mbyllur i gjithë takimi. Andrejs Baklanovs shënoi nga afërsia. Për Kosovën ishin dy miqësore tjera të suksesshme me selektorin Agon Ramadani.
Letonia dhe Lituania do të jenë nikoqire të Evropianit 2026.