Galatasaray është shpallur kampion në Superligën e Turqisë për sezonin 2022/23.
Klubi nga Stambolli ia doli të rikthej titullin pas katër vjetëve.
Skuadra e drejtuar nga Okan Buruk shënoi fitore sonte në udhëtim ndaj Ankaragucu, për të siguruar edhe matematikisht titullin.
Ndeshja e zhvilluar në “Eryaman Stadium” përfundoi me rezultatin 1:4.
Milot Rashica la gjurmë në këtë triumf, pasi asistoi te goli i parë i shënuar nga Mauro Icardi (7’). Ky i fundit ishte edhe autor i golit të dytë (38’).
Për reprezentuesin e Kosovës ishte ky asistimi i tij i shtatë në kampionatin turk, krahas katër golave. Ai sonte luajti për 79 minuta.
Dy golat tjerë për “Galatan” u shënuan nga Baris Yilmaz (73’) dhe Sergio Oliveira (78’).
Ndërkaq, golin e nderit për vendasit e shënoi Milson (16’).
Për Galatasarayn është ky titulli i 23-të në histori të klubit. /Gazeta Express/