Zëvendëspresidenti i Galatasarayt, Erden Timur, ka udhëtuar në Angli për t’u takuar me krerët e disa klubeve atje. Një prej klubeve është Norwich City. Timur shpreson ta bindë Norwichin ta shesë Rashicën për 7 milionë euro. Kështu kanë raportuar mediume të ndryshme në Turqi të enjten.
“Galatasaray është në pritje të transferimit të Milot Rashicës, i cili dha një kontribut të rëndësishëm në titullin e kampionit. Futbollisti i Kosovës gjithashtu ka zbuluar dëshirën e tij për të qëndruar në Galatasaray. Erden Timur do të ulet me Norwich Cityn me qëllim për ta blerë për 6-7 milionë euro”, shkruan “hurriyet”.
Sulmuesi i krahut, 27-vjeçari Rashica, me klubin e kategorisë së dytë të Anglisë ka kontratë deri në vitin 2025. Futbollisti i Kosovës me fanellën e Galatës në edicionin 2022/2023 shënoi gjashtë gola dhe asistoi shtatë herë në 30 ndeshje në të gjitha garat.