Gana ka arritur që të fitojë në ndeshjen e dytë në Grupin H, duke fituar me rezultat 3-2. Mohammed Salisu (24’) dhe Mohammed Kudus (34’, 68’ ) shënuan për Ganën kurse për Korenë e Jugut realizator i dyfishtë ishte Cho (58’, 61’)
Gana ka fituar me rezultat 3-2 kundër Koresë së Jugut, në një ndeshje që u shënuan plot pesë gola dhe kishte spektakël në Katar.
Koreja e Jugut e filloi më mirë ndeshjen duke pasur posedimin e topit por edhe disa raste. Megjithatë, ishin Gana që kaluan në epërsi pas një ndërprerje.
Mohamed Salisu u gjend më së miri në zonë për të shënuar gol në minutën e 24-të për të shënuar gol, gjë që nuk ishte shumë e vështirë për të.
U mendua që ky gol do të anulohet për shkak se kishte një kontakt me dorë nga Ayew, megjithatë gjyqtari Anthony Taylor e pranoi golin dhe rezultati ishte 1-0 për ganezët.
Gana do ta dyfishonte epërsinë në minutën e 34-të.
Jordan Ayew lansoi një kros të mirë në zonë e ku Mohammed Kudus bëri një shkëputje të mirë duke shënuar golin e dytë për rezultat 2-0, me të cilën rezultat përfundoi pjesa e parë.
Koreja e Jugut hyri me të gjitha forcat në pjesën e dytë dhe arritën shumë shpejt që ta barazojnë rezultatin.
Gue-Sung Cho shfrytëzoi mirë një krosim të Lee Kang-Im për të shënuar golin e parë të Koresë në këtë ndeshje në minutën e 58-të.
Jin-Su Kim bëri një pasim tjetër për Gue-Sung Cho, i cili mposhtu portierin duke shënuar golin e dytë në këtë ndeshje dhe barazuar rezultatin 3 minuta më vonë.
Por, kur mendohej që Koreja Jugore do të kthehej në lojë, në skenë dolën përsëri futbollistët ganez ku shënuan golin e radhës.
Ishte Inaki Williams që bëri një krosim tjetër në zonë, topi shkoi të Mohammed Kudus i cili shënoi gol në minutën e 68-të të ndeshjes për ta kaluar përsëri në epërsi Ganën.
Koreja ishte afër për ta barazuar rezultatin në minutën e 76-të të ndeshjes me anë të Kang-In Lee, përpjekja e të cili u mbrojt nga portieri i Ganës, Zigi.
Rasti tjetër i Koresë për ta barazuar rezultatin ishte ai i minutës së 84-të kur Jin Su-Kim goditi topin por ai përfundoi mbi portën e Ganës.
Kjo fitore Ganës i jep vendin e dytë, pas Portugalisë që ka po ashtu tri pikë por ka një ndeshje më pak të zhvilluar. Koreja mbetet me një pikë dhe kualifikimin do ta kërkojë në ndeshjen e fundit kundër Portugalisë së Cristiano Ronaldos.