Gennaro Gattuso njihet për pasionin e tij të zjarrtë në bankinë gjatë ndeshjeve të skuadrave që drejton. Në ndeshjen e fundit të kampionatit kroat, në krye të Hajduk Split, trajneri italian u tregua më energjik se kurrë, madje shpërtheu edhe ndaj vetë lojtarëve të tij. Ish-mesfushori kampion bote tregoi se është gati të bëjë gjithçka për të siguruar fitoren.
Skuadra e Splitit luante në fushën e Sibenikut, në një ndeshje që, pavarësisht diferencës në renditje (Hajduku i pari, Sibeniku i parafundit), rezultoi shumë e vështirë. Vetëm në kohën shtesë, Hajduku arriti të siguronte tre pikët falë golit të Krovinovic, pas një loje të tensionuar që kishte parë më herët golat e Livajës dhe Kulusicit.
Gattuso shpërthen në pankinë pas golit të Hajdukut, qorton lojtarët e tij
Një gol shumë i rëndësishëm erdhi dy minuta pasi vendasit kishin barazuar, ndonëse ishin me një lojtar më pak gjatë gjithë pjesës së dytë. Por në vend që të festonte, Gattuso vendosi të vërë në rregull lojtarët e tij. Pas golit të Krovinovic, ai u drejtua veçanërisht ndaj Bamba dhe Hrgovic.
Trajneri italian i zhvendos lojtarët me forcë
Dy lojtarët e Hajdukut, pas festimeve, ishin afër bankinës duke pirë ujë dhe duke u dukur mjaft të qetë. Por nuk e kishin parashikuar reagimin e Gattusos, i cili i tërhoqi me forcë për bluzat dhe i futi përsëri në fushë, duke i kërkuar në mënyrë të ashpër të merrnin pozicionet e tyre. Përveç kësaj, Gattuso e shfryu nervozizmin e tij duke gjuajtur me këmbë një shishe uji dhe duke vazhduar të bërtiste i zemëruar.
Ky ishte një veprim i qëllimshëm për të mbajtur lojtarët të fokusuar në minutat e fundit dramatike dhe për të shmangur çdo relaksim pas golit. Gattuso e dinte mirë sa e rëndësishme ishte fitorja për të ruajtur vendin e parë së bashku me Rijekën. Për të, nuk ishte momenti për të humbur vëmendjen dhe për të rrezikuar suksesin. Për festime kishte kohë pas bilbilit të fundit.