Dukagjini ka marrë fitoren e parë këtë edicion, duke mposhtur Gjilanin me rezultat 2-0 në Klinë, në kuadër të javës së dytë të Superligës së Kosovës.
Pjesa e parë ishte e gjallë dhe me raste nga të dyja skuadrat. Qysh në minutën e 2-të, Dienit Isufi rrezikoi për Dukagjinin pas harkimit të Victor Hugos, por Armend Thaqi shpëtoi Gjilanin mbi vijën e portës.
Në minutën e 20-të, Gjilani humbi një rast të artë, kur pas një depërtimi të Prapashticës dhe goditjes së Aganspahiç, portieri reagoi mirë, ndërsa në topin e kthyer Basa goditi mbi portë.
Në minutën e 34-të erdhi goli i parë i ndeshjes, kur Victor Hugo harkoi nga këndi, ndërsa Mërgim Pefqeli me kokë nga pika e penalltisë shënoi për 1-0.
Deri në fund të pjesës së parë pati edhe raste të tjera, por pa ndryshuar rezultatin.
Në pjesën e dytë, Gjilani tentoi të gjente barazimin. Mevlan Adili provoi me një gjuajtje, por pa sukses për Gjilanin.
Në minutën e 73-të portieri Vokli Laroshi lëshoi portën, por Iljasa Zulfiu nuk arriti të shënonte, mes pretendimeve se ai preku topin me dorë jashtë zonës.
Në minutën e 90+1, Dukagjini vulosi fitoren. Iljasa Zulfiu realizoi golin e dytë për vendasit, duke i dhënë tre pikët e plota skuadrës së Klinës.
Dukagjini shënon suksesin e parë në kampionat, ndërsa Gjilani regjistron humbjen e parë në këtë edicion, pas barazimit në xhiron e parë.