Klubi i futbollit, Gjilani, ka konfirmuar se gjendja e mbrojtësit të djathtë, Përparim Islamit, është stabile dhe jashtë rrezikut për jetë.
Islami u lëndua në ndeshjen kundër Trepçës ’89, e cila u zhvillua të dielën në Mitrovicë dhe u mbyll 1:1.
“Sport Club Gjilani njofton se gjendja shëndetësore e futbollistit Përparim Islami është stabile dhe jashtë ndonjë rreziku. Futbollisti Islami pësoi një çarje në regjionin e arkadës (ana e djathtë) në një duel me futbollistin e Trepçës ’89 dhe u dërgua me urgjencë në spitalin rajonal të Mitrovicës. Nga kompletimi imazherik me CT dhe konsultë oftalmologu është përpunuar plaga, duke u suturuar (qepur) plot 15 herë, me ç’rast u konstatua fatmirësisht se është kursyer syri nga ky lëndim”, thuhet në komunikatën e Gjilanit.