Ish-gjyqtari i mirënjohur, tash ekspert i referimit Jakup Musolli në emisionin Var në Tëvë1, ka thënë se futbolli kosovar ka gjyqtarë shumë të mirë, por janë disa që po e prishin imazhin me sjellje arrogante në fushë.
Ai ka thënë se siguria e tyre është maksimale dhe disa po e keqpërdorin këtë duke u sjell si “zot” në fushë.
“Në kohën tonë gjërat kanë qenë më të vështira, siguria nuk ishte në nivel. Federata ka krijuar tash kushte shumë të mira. Gjyqtarët kanë siguri maksimale. Për sigurinë e tyre kujdesën Njësia Speciale e Policisë, pra janë policët e njëjtë që po luftojnë në bandat kriminale në Veri. Kjo i bënë gjyqtarët të ndihen tejet sigurt në fushë, por janë disa që po e keqpërdorin këtë.
Disa gjyqtarë po sillën sikur të jenë “zot” në fushë dhe me arrogancë sillen ndaj futbollistëve e kjo nuk është e mirë. Unë po them se kemi gjyqtarë shumë të mirë që mund të referojnë në nivele shumë të larta, por janë disa që me sjellje të këqija po e prishin imazhin e tyre”, ka thënë Musolli.