Drilon Hazrollaj në edicionin e kaluar kishte shënuar 25 gola për skuadrën e Malishevës. Ishte më i miri në kampanjën në të cilën Malisheva e arriti suksesin historik – paraqitjen në kualifikimet e Ligës së Konferencës.
Në edicionin aktual, Hazrollaj ka dukshëm më pak gola të shënuar për Malishevën, nëntë gjithsej.
Por të shtunën arriti sukses të rëndësishëm personal, duke u transferuar te Rapidi i Bukureshtit. Skuadrës rumune i bashkohet pas fundit të edicionit aktual.
Shumë gola e suksese, Hazrollaj synon edhe me skuadrën e famshme nga Bukureshti.
“Dua t’u them tifozëve të Rapidit se jam shumë i lumtur që jam këtu dhe mezi pres që t’u shoh në verë. Ju premtoj se do të jap çdo gjë nga vetja, në secilën ndeshje”, ka deklaruar Hazrollaj të dielën në një intervistë për kanalin zyrtar të Rapidit në YouTube.
Zyrtarizimi i Hazrollajt te Rapidi i Bukureshtit është bërë të shtunën mbrëma. Sipas njoftimit të klubit rumun, 21-vjeçari ka nënshkruar kontratë të vlefshme deri në fundin e edicionit 2027/2028. Por deri në fund të edicionit aktual, Hazrollaj do të vazhdojë të paraqitet te Malisheva, e në verë i bashkohet tri herë kampionit rumun. Rapidi është edhe 13 herë fitues i Kupës së Rumanisë.
Vlera e Hazrollajt raportohet të jetë rreth 800 mijë euro. Në Kosovë ka shfaqur potencialin e tij që në moshë të re, ndërsa është vlerësuar edhe nga njohës të futbollit.
Hazrollaj në intervistën për “Rapid TV”, ka thënë se skuadrën e ka ndjekur për kohë të gjatë.
Në stadiumin “Superbet Arena – Giulesti” ishte i pranishëm në disfatën 2:1 nga Universitatea Craiova. Vitin e kaluar e kishte parë nga afër ndeshjen ndaj Sepsit, ndërsa kishte mbetur i mahnitur me atmosferën në tribuna.
Te Rapidi në atë kohë kanë luajtur Albion Rrahmani, Ermal Krasniqi dhe Florent Hasani. Të tre kanë bërë lëvizje tjera në karrierë, ndërsa me Hazrollajn është vazhduar tradita e transferimit të lojtarëve nga klubet kosovare në klubet rumune.
“E kam ndjekur Rapidin për kohë të gjatë. Erdha këtu për shkak të tifozëve, projektit, çdo gjë këtu është shumë mirë. Dhe mezi prisja që të vija këtu. Kam qenë vitin e kaluar në këtë stadium, në ndeshjen ndaj Sepsit. Në atë ndeshje luajtën Albioni, Ermali dhe Florenti dhe e kam parë atë ndeshje. Albionin dhe Ermalin i kam shokë. Kam folur me ta. Ata më kanë thënë se Rapidi është skuadër e madhe dhe duhet të shkosh për shkak se tifozët janë të shkëlqyer dhe ekipi është shumë i mirë për ty”, ka pranuar Hazrollaj.
Hazrollaj, që të premten realizoi një gol për Malishevën në disfatën 2:1 nga Suhareka, ka theksuar se për Rapidin do të jap gjithçka nga vetja për të arritur sa më shumë suksese. Rapidi në edicionin aktual është në grupin e skuadrave që luftojnë për titull. Hazrollaj ka folur edhe për dallimin e futbollit në Rumani e Kosovë.
“Unë jam futbollist i krahut të djathtë. Më pëlqen të dribloj vazhdimisht dhe dua të kem prekje sa më shumë të topit. Dhe natyrisht, dua të shënoj gola. Natyrisht futbolli në Rumani është në nivel tjetër sepse intensiteti është më i lartë. Por, mund të përshtatem këtu me intensitetin dhe mendoj se mund të luaj. Nga Albioni kam kuptuar se klubi është i madh dhe ka presion këtu në çdo ndeshje. Por më pëlqen të jem nën presion”, deklaroi 21-vjeçari.
Hazrollaj, që me Malishevën në edicionin aktual i ka edhe tri asistime, e ka një paraqitje për Kosovën U21, ndaj Polonisë në vitin 2023. Ka luajtur në tri ndeshje për U19 të Kosovës.