Gjyqtari kryesor i finales Argjentina – Franca në Kupën e Botës, Szymon Marciniak, do të bëhet gjyqtari i parë nga Polonia që do ta drejtojë një finale.
Marciniak 41-vjeçar, mungoi në Kampionatin Evropian të vitit të kaluar për shkak të problemeve me zemër.
“Vetëm unë dhe ekipi im e dimë se çfarë kohë e vështirë ishte për mua”, tha Marciniak për sëmundjen “Tachycardia”, nga e cila tash është shëruar.
Marciniak ka qenë gjyqtar në ndeshjen e të dyja përfaqësueseve finaliste në Katar. Ai drejtoi ndeshjen e Grupit D të cilën Franca e fitoi ndaj Danimarkës, 2:1, dhe ishte gjyqtar në fitoren 2:1 të Argjentinës përballë Australisë në një të tetën e finales.
Një prej asistentëve në finale ka përcjellë hapat e babait të tij në vijë. Tomasz Listkiewicz, do ta mbajë flamurin dhe do të vrapojë në vijë si gjyqtar anësor, njësoj siç kishte bërë babai i tij në finalen e vitit 1990 në Romë, kur Argjentina ishte mposhtur nga Gjermania Perëndimore, 1:0.