Debati se kush është më i miri i historisë nuk do të përfundojë kurrë, përkundër faktit se Lionel Messi ka fituar trofeun e Kupës së Botës.
Shtatë herë fituesi i ‘Topit të Artë’ arriti ta fitonte trofeun e vetëm që i mungonte në karrierë, derisa nga shumë njerëz tani konsiderohet si më i miri i historisë, përkundër që shumë të tjerë kanë tjera preferenca si Cristiano Ronaldo, Pele, Maradona, Zinedine Zidane apo Ronaldo braziliani.
Për Leo Messin ka folur edhe ish-shoku i skuadrës së tij Andres Iniesta, i cili e ka konsideruar atë si më të mirin e historisë edhe nëse nuk do ta fitonte Kupën e Botës.
“Në mendimin tim, Messi nuk kishte nevojë për Kupën e Botës që të konsiderohej si më i miri. Me Kupën e Botës apo pa të, Messi për mua është lojtari më i mirë në histori”.
“Unë besoj se njerëzit që vendosnin në dyshim cilësitë e Messit para Kupës së Botës, do të vazhdojnë të dyshojnë te ai”, tha Iniesta.
Tutje ish-mesfushori i Barcelonës ka thënë se përsëri kritikët do të gjejnë ndonjë justifikim për Messin që mos ta konsiderojnë si më të mirin e historisë.
“Jam i sigurt se kritikët do të gjejnë ndonjë justifikim për Messin dhe për të mos e konsideruar si më të mirin. Gjithsesi, për ta lënë pas këtë debat që nuk ka fund, mendoj se Kupa e Botës ishte e merituar për Messin dhe për të gjithë Argjentinën”, u shpreh Iniesta.