Interi u ka rezistuar sulmeve të shumta të Portos për të bërë vend në çerekfinale të Ligës së Kampionëve. Porto e Interi të martën mbrëma luajtën pa gola. Por Interi avancon falë fitores 1:0 në ndeshjen e parë të një të tetës së finales.
Skuadra portugeze ka dominuar në fushë, por pa konkretizim. Ka pasur posedim të topit prej 66 për qind, ndërsa ka krijuar 19 raste gjithsej. Ndërkohë Interi i kishte 11 raste, kurse i kishte pesë goditje në kornizë të portës. Porto i kishte po ashtu pesë. Portugezët ishin pranë golit në minutat e fundit, ndërsa e kanë goditur edhe shtyllën.
Interi i është bashkuar në çerekfinale Chelseat, Bayernit, Milanit, Benficës dhe Manchester Cityt. Kundërshtarin e çerekfinales e mëson të premten në mesditë.