Skuadra e Interit ka kaluar në finale të Superkupës së Italisë, ku do të përballet me Napolin.
Në ndeshjen e dytë gjysmëfinale, të luajtur të premten mbrëma në Riad të Arabisë Saudite, Interi e mposhti Lazion me rezultatin 3:0.
Sulmuesi Marcus Thuram e kaloi Interin në epërsi 1:0 me golin e shënuar në minutën e 17-të pas asistimit të Federico Dimarcos.
Golin e dytë për Interin, e realizoi Hakan Calhanoglu nga penalltia në minutën e 50-të. Fitoren bindëse të Interit në këtë takim, e vulosi Davide Frattesi në minutën e 87-të.
Kristjan Asllani u inkuadrua tek Interi në minutën e 81-të, ndërsa Elseid Hysaj dy minuta me vonë hyri në lojë te Lazio.
Finalja e Superkupës së Italisë, do të luhet të hënën prej orës 20:00.
Interi është fitues në fuqi i Kupës dhe Superkupës së Italisë, ndërkohë Napoli edicionin e shkuar u shpall kampion në Serie A.