Skuadra e Interit ka vazhduar me fitore në Serie A. Pas triumfit javën e shkuar në xhiron e parë të këtij edicioni, Interi ka shënuar edhe fitoren e dytë në po aq ndeshje të luajtura.
Të hënën mbrëma, skuadra e trajnerit Simone Inzaghi ka triumfuar në udhëtim te Cagliari me rezultatin 2:0.
Interi pati paraqitje më të mirë në këtë përballje dhe çështjes së fituesit i dha fund në 45 minutat e para, ku shënoi të dy golat. Mbrojtësi i krahut, Denzel Dumfries e kaloi Interin në epërsi në minutën e 21-të pas asistimit të Marcus Thuramit.
Ndërkohë, golin e dytë për Interin, e realizoi sulmuesi Lautaro Martinez. Martinez shënoi në minutën e 30-të pas asistimit të Federico Di Marcos.
Për Cagliarin, kjo është humbja e parë këtë edicion pasi në duelin e parë ka luajtur baras.