Ish-futbollisti Besart Berisha është rikthyer në Australi me qëllimin që të sigurojë punë si trajner në top-ligë.
Sulmuesi më i mirë në histori të A-Leagues në Australi pati realizuar 142 gola në 236 paraqitje në ligën kombëtare australiane për Brisbane Roar, Melbourne Victory dhe Western United.
Berisha ka fituar katër tituj të A-Leagues dhe dy herë e ka marrë Këpucën e Artë për më së shumti gola në sezon.
Pas pensionimit tre vjet më parë, Berisha është rikthyer kah profesioni i trajnerit dhe ka qenë pjesë e stafit të klubit Prishtina dhe përfaqësueses së Kosovës.
Tani, Berisha synon të marrë rol të kryetrajnerit dhe këtë dëshiron ta bëjë në A-League.
“Dua të jem trajner në A-League”, ka thënë 39-vjeçari, shkruan “heraldsun”. “Kam punuar shumë në tre vjetët e fundit që të bëhem trajner i mirë. Kam udhëtuar nëpër botë, kam takuar trajnerë, kam vizituar trajnerë dhe jam ndikuar nga shumë trajnerë të mëdhenj si Ange Postecoglou dhe Kevin Muscat, që janë shumë të suksesshëm dhe shpresoj se një ditë do t’i ndjek hapat e tyre. Po shpresoj që një ditë do ta kem rastin të jem trajner në A-League”.
Berisha së fundmi ka hapur një kamp futbolli në Brisbane për të rinjtë, në bashkëpunim me Wynnum Wolves.