Harry Kane ka insistuar se Anglia nuk është “e frikësuar” të thotë se mund ta fitojë Kupën e Botës 2022 dhe beson se forma e dobët ka ulur pritshmëritë para nisjes së Botërorit në Katar.
Të udhëhequrit e Gareth Southgateit janë favoritë për të triumfuar pasi kanë shkuar deri në gjysmëfinale në Botërorin 2018, si dhe ishin finalist të Evropianit vitin e kaluar.
Dhe Kane e ka ndjesinë se Anglia mund ta bëj një hap më shumë në Lindjen e Mesme dhe ta fitojë trofeun e parë të madh që prej Kupës së Botës 1966.
“Në Angli para 10, 15 vjetësh, ishim të frikësuar të thoshim se dëshirojmë ta fitojmë turneun. Me Southgatein në katër apo pesë vjetët e fundit, nuk jemi të frikësuar për një gjë të tillë. Ne besojmë se mundemi. Do të gaboja nëse do të mendoja ndryshe. Do të jetë vështirë por duhet të mundohemi shumë dhe të kemi pak fat që gjërat të shkojnë në të mirën tonë dhe ta arrijmë suksesin”, ka thënë Kane të mërkurën në një intervistë dhënë për “Sky Sports”.
Anglia e nis turneun kundër Iranit më 21 nëntor dhe është në kërkim të fitores së parë në shtatë ndeshje, pas tri barazimeve e tri disfatave.
Kane është në formë të mirë me Tottenhamin pasi ka shënuar 13 gola në të gjitha garat.