Klubi i Prishtinës pas një sezoni dëshpërues që pati vitin e kaluar si në rezultate ashtu edhe në aspekte të tjera, tani është kthyer në ‘binaret’ e duhura. Rreth kësaj çështje ka folur kapiteni i bardhë e kaltërve, Gledi Mici i cili tha se kanë ndryshuar shumë gjëra, transmeton Gazeta Metro.
Ai deklaroi se me ardhjen e trajnerit, Ismet Munishi është krijuar një seriozitet ndryshe nga herët e kaluara te Prishtina.
Ndërkaq, theksoi faktin se është hera e parë në tre vitet e tij te kryeqytetasit që pagën e ka marrë me kohë.
”Atmosfera për dallim nga viti i kaluar është sikurse nata me ditën. Vjet kemi qenë të mërzitur sepse kemi pasur probleme, tani edhe kushtet janë rregulluar. Karantinë po shkojmë para çdo ndeshje që tregon seriozitetin e klubit të gjitha këto kërkesa janë të trajnerit. Në tre vitet që jam unë në Prishtinë hera e parë që ndodhin që pagesat i kemi marrë me kohë, plus në çdo lojë kemi pasur premia,” tha Mici të dielën në emisionin ‘Kampionët’.
Prishtina pas 12 ndeshjeve të para në Superligën e Kosovës gjendet në pozitën e katërt me 21 pikë, kurse nesër me fillim nga ora 18:00 luan ndeshjen e mbetur të javës së nëntë kundër Trepçës’89 në stadiumin ‘Fadil Vokrri’.