Kapiteni i skuadrës së Viktoria Plzenit, Lukash Hejda, ka kërkuar ndihmën e tifozëve për ndeshjen që do ta luajë të enjten kundër dy herë kampionit të Kosovës, Ballkanit.
Hejda për faqen zyrtare të skuadrës çeke ka theksuar se me ndihmën e tyre mund të arrihet rezultati pozitiv.
Dueli mes Viktoria Plzenit dhe Ballkanit luhet nga ora 21:00, ndërsa i takon Grupit C të fazës grupore të Ligës së Konferencës.
Ballkani e ka arritur fazën grupore të këtij niveli të garave për herën e dytë rresht.
Asnjë skuadër tjetër e Kosovës nuk e ka shënuar të njëjtin sukses.
Në Grupin C janë edhe Dinamo e Zagrebit dhe Astana.
“Dua që t’i ftojë të gjithë tifozët e Viktorias për ndeshjen e së enjtes. Do të jetë e rëndësishme që të hyjmë në garë në mënyrën më të mirë të mundshme dhe tifozët padyshim se do të na ndihmojnë. Besoj se ‘Doosan Arena’ do të jetë i mbushur plot”, ka thënë kapiteni i çekëve, Hejda, i cili luan si qendërmbrojtës.