Një grup i ushtarëve të Rumanisë, që shërbejnë në kuadër të KFOR-it në Kosovë, kanë vizituar të enjten mbrëma futbollistët e Rumanisë në hotelin e tyre në Prishtinë.
Kosova e Rumania përballen sonte.
Sipas “gsp.ro”, takimi i lojtarëve me ushtarët ka zgjatur rreth gjysmë ore. Lojtarët e Rumanisë kanë dhënë shumë autografe dhe kanë bërë fotografi. Edhe selektori 79-vjeçar Mircea Lucescu ishte në takim. Por ai u largua më shpejtë.
“Ishte një takim emocional dhe ne falënderojmë djemtë dhe selektorin që gjetën kohë për këtë takim. Kemi shkëmbyer fjalë, ishin shumë të qasshëm për autografe e fotografi. Mora disa nënshkrime në top për djalin tim, që është lojtar te Daco-Getica. Ia dërgova fotografitë dhe mendoj se nuk do të flejtë sonte nga gëzimi. Do t’i përkrahim nga baza jonë dhe do të jemi aq të zhurmshëm sa do të dëgjohet deri në stadium”, ka thënë Viorel Constancin, njëri prej ushtarakëve të Rumanisë.