Federata e Futbollit të Turqisë të dielën ka konfirmuar se skuadrat nga regjionet që janë prekur nga tërmeti i rëndë i 6 shkurtit janë tërhequr nga garat e këtij edicioni.
Në mesin e skuadrave të tërhequra nga garat janë edhe Gaziantepi dhe Hatayspori të Superligës së Turqisë.
Nga gara janë tërhequr edhe dy skuadra të kategorisë së dytë, dy nga kategoria e tretë dhe tri nga kategoria e katërt. Numri i skuadrave që vendosin të tërhiqen mund të rritet ndërkohë. Turqia është goditur nga një tërmet shumë i rëndë që ka lënë afro 25 mijë persona të vdekur.
Dhe në regjionet e prekura aktualisht askush nuk mendon për futbollin. Pjesë e Gaziantepit është futbollisti kosovar, Valmir Veliu. Ai ishte në Kosovë kur ndodhi tërmeti. Federata e Futbollit të Turqisë të dielën lëshoi njoftimin me të cilin konfirmonte se ka pranuar kërkesën e klubeve për të ndërprerë garat e këtij edicioni. Ndeshjet do t’u takojnë skuadrave kundërshtare me rezultat zyrtar, ndërsa në edicionin 2023/2024, skuadrat do të luajnë në nivelin ku janë paraqitur në këtë edicion. Aktualisht futbolli në Turqi është i pezulluar.
“Një ditë para tërmetit unë erdha në Kosovë për shkak se klubi na dha ditë të lira. Tani duhet të gjej një klub ku do të luaj në formë huazimi deri në fund të këtij kampionati. Më pas do të kthehemi me Gaziantepin në Superligë. Besoj që unë do të vazhdojë në ndonjë klub të Superligës”, ka thënë Valmir Veliu të dielën për KOHËN.
Ai vazhdon të jetë në Kosovë. Federata turke ua ka lejuar klubeve regjistrimin e dy lojtarëve të huaj deri në fund të këtij edicioni. Në Turqi ka numër të madh të lojtarëve nga Kosova.