Përfaqësuesja e Kosovës në hendboll, i ka dhënë fund gjasave për kualifikim në Kampionatin Evropian që mbahet vitin tjetër. Kosova, të dielën u mposht nga Bosnjë e Hercegovina për ta regjistruar humbjen e katërt në po aq ndeshje të luajtura në kuadër të fazës së dytë kualifikuese. Dueli i luajtur në Tuzlla të Bosnjës, u mbyll me rezultatin 25:18 në favor të ekipit vendas.
Në fakt, për Bosnjën, kjo ishte fitorja e dytë rresht ndaj Kosovës, pasi e mposhti edhe të mërkurën mbrëma në Prishtinë me shifrat 25:22. Edhe në këtë takim, boshnjakët ishin më të mirë se “Dardanët”, të cilët pothuajse gjatë tërë kohës ishin në ndjekje të rezultatit. Pjesa e parë, përfundoi 10:7 në favor të Bosnjës, e cila nuk arriti të shkëputej në më shumë se pesë gola në rezultat.
Për Bosnjën, kjo është fitorja e dytë pasi u mposht në dy ndeshjet e para të kësaj faze kualifikuese. Benjamin Buriq ishte më i dalluari te Bosnja, pasi ndeshjen e mbylli me shtatë gola të shënuar nga tetë tentime.
Me lojë të mirë te vendasit, u veçuan edhe Mirko Herceg e Marko Paniq, që shënuan nga katër gola secili. Kapiteni i Kosovës, Valon Dedaj ishte golashënuesi më i mirë te “Dardanët” me 5 gola të realizuar, ndërsa katër i shtoi edhe Drenit Tahirukaj. Egzon Gjuka pati tri gola, ndërsa me nga dy kontribuuan Kastriot Jupa e Rron Ramadani, por që nuk arritën ta evitojnë humbjen në Tuzlla. Deri në fund të kësaj faze kualifikuese, Kosova i luan edhe dy ndeshje në fund të muajit të ardhshëm. Më 27 prill në Prishtinë e pret Malin e Zi, ndërsa tri ditë më vonë e mbyll këtë fazës të kualifikimeve në udhëtim te Sllovenia. Grupit të shtatë, ku është Kosova, i prinë Sllovenia që ka gjashtë pikë, falë tri fitoreve në po aq ndeshje të luajtura.