Kosova do të përfaqësohet nga 26 sportistë në Lojërat Mesdhetare në Rërë “Heraklion 2023”. Edicioni i tretë i kësaj ngjarjeje do të mbahet prej 9 deri më 16 shtator në Heraklion të Greqisë, ka njoftuar Komiteti Olimpik i Kosovës.
Kosova në Lojërat Mesdhetare në Rërë do të përfaqësohet në volejbollin në rërë, basketbollin 3×3, hendbollin në rërë, notin në ujëra të hapura dhe në karatenë në rërë.
“Hendbolli në rërë, basketbolli 3×3, dhe karateja në rërë përfaqësojnë për herë të parë vendin tonë në një ngjarje të tillë. Hendbolli merr pjesë me ekipin e meshkujve, ndërsa basketbolli 3×3 dhe volejbolli në rërë në të dyja konkurrencat”, ka njoftuar KOK-u.
Edicioni i parë i Lojërave Mesdhetare në plazh është mbajtur në Pescara të Italisë në vitin 2015. Kosova nuk mori pjesë në atë edicion. Debutoi në vitin 2019 në Patras të Greqisë.
Në Heraklsion pritet 1500 sportistë nga 26 shtete të ndryshme. Do të garohet në 13 sporte gjithsej.
Ekipi i Kosovës në hendboll përbëhet nga dhjetë lojtarë. Hendbolli në rërë nuk luhet në Kosovë, por është formuar një ekip me lojtarë të hendbollit të rregullt. Me katër sportistë, Kosova përfaqësohet në volejbollin në rërë, ndërsa me tetë në basketbollin 3 kundër 3.
Në not dhe në karate në rërë, Kosova do të ketë nga dy garues.
Në Heraklion pritet të merret vendimi që Kosova të jetë nikoqire e Lojërave Mesdhetare të vitit 2030.