Kosova ka pësuar humbje nga Austria në ndeshjen e parë të raundit të parë kualifikues të plejofit për Botërorin 2027 që organizohet në Brazil.
Pas humbjes 2:1 të premten mbrëma në stadiumin “Fadil Vokrri” në Prishtinë, janë zbehur gjasat për avancim tutje.
Kosova krijoi epërsi 1:0 prej minutës së 14-të kur shënoi kapitenia dhe sulmuesja e Eintracht Frankfurtit, Erëleta Memeti.
Megjithatë, përvoja dhe aspekti fizik më i mirë i Austrisë, bëri që austriaket ta përmbysin rezultatin.
Louise Schoffel i barazoi shifrat në minutën e 37-të. Dhe nëntë minuta para fundit, austriaket e siguruan fitoren me golin e Nicole Billas.
Ndeshja kthyese e këtij raundi kualifikues për Botërorin 2027 luhet të martën nga ora 18:00 në Vjenë.