Federata e Futbollit e Kosovës më 6 shkurt njoftoi se më 5 qershor do zhvilloj miqësore kundër Norvegjisë në Oslo, ndërsa është në bisedime për aranzhimin e miqësores së dytë. Por miqësore të dytë nuk pritet të ketë në qershor.
Të paktën kështu ka lënë të kuptohet kryetari i Federatës së Futbollit të Kosovës, Agim Ademi.
“Tani kemi ndeshjen e radhës miqësore të planifikuar më herët. Konsiderojmë se Norvegjia është prej kundërshtareve të forta. Ndeshje tjetër mund të ketë, gjithnjë nëse gjejmë kundërshtar që preferohet nga trajneri. Është në dorën e trajnerit. Gjithsesi ky grumbullim do të shërbej shumë për lojtarët dhe për trajnerin. Është atmosferë e mirë dhe presim të vazhdojmë me këtë ritëm të punës”, ka thënë Ademi për KOHËN.
Kosova në mars zhvilloi dy ndeshje miqësore. Fitoi ndaj Armenisë, kurse humbi nga Hungaria. Ishin dy miqësoret e para për selektorin gjerman Franco Foda në krye të Kosovës.