Kombëtarja e Kosovës U17 ka pësuar edhe humbjen e dytë radhazi në kuadër të turneut kualifikues të Grupit 8 për Evropianin 2023.
Dardanët janë mposhtur nga Greqia U17 me rezultat të thellë 5-0 në ndeshjen e zhvilluar në stadiumin Zahir Pajaziti në Podujevë.
Panikidis shënoi për 1-0 për grekët në minutën e shtatë derisa Tzimas ngriti epërsinë në 2-0 pas 32 minutave lojë.
Me epërsinë e dyfishtë të grekëve përfunduan 45 minutat e para në këtë sfidë. Greqia u tregua më e mirë edhe në 45 minutat finale të kësaj sfide, ku në minutën e 73-të ishte Tzimas që realizoi golin e dytë personal në këtë sfidë për ta ngritur epërsinë e helenëve në 3-0.
Në pesë minutat e fundit të ndeshjes grekët shënuan edhe dy herë me Politakis për 4-0 dhe Mouzakitis për 5-0. Kosova pas dy ndeshjeve është e fundit pa pikë, derisa Greqia ka tri pikë sa ka edhe Italia dhe Finlanda.
Ndeshja e radhë për Dardanët zhvillohet të martën ndaj Finlandës U17.