Spanja mundi Gjermaninë 2-1, këtë të premte, në çerekfinale të Kampionatit Evropian Euro 2024. Me këtë vendasit u eliminuan, duke bërë që Toni Kroos t’i thotë lamtumirë futbollit pa titullin që kishte ëndërruar.
Pas ndeshjes, numri “8” u pyet për mbylljen e karrierës në një mënyrë që ai nuk e priste dhe ai foli gjithë sinqeritet.
“Të gjithë së bashku kishim një synim të madh (që ishte fitimi i Kampionatit Evropian). Kjo ëndërr tashmë është shkatërruar, edhe pse e dimë që Gjermania ka pasur një turne të mirë”, tha mesfushori pas ndeshjes, duke bërë të qartë se pjesëmarrja gjermane ishte pozitive dhe duke falenderuar mbështetësit.
“Ne të gjithë mund të jemi krenarë. Do të jem i lumtur nëse mund të ndihmoj pak, në mënyrë që ne, në futbollin gjerman, të mund ta pretendojmë përsëri atë trofe”, shtoi ai.
Në fushë golat e ndeshjes u shënuan nga Dani Olmo, në fillim të pjesës së dytë, Florian Wirtz, në fund të kohës së rregullt të takimit, dhe Mikel Merino, në minutat e fundit të kohës shtesë.
Tani, Spanja pret fituesin e Portugali – Francë për të zbuluar se me kë do të përballen në gjysmëfinale të Euro 2024.