Kryeministri i Republikës së Kosovës, Albin Kurti ishte prezent mbrëmë në ndeshjet finale të Kupës së Kosovës në hendboll.
I pari i Qeverisë e ndau këtë trofe për ekipin fitues – Trepçën.
Por, ajo që ra në sy më shumë ishte fakti se kreu i VV-së iu bashkua festës së mitrovicasve, të cilët po kërcenin për të festuar, ndërsa në mesin e ekipit “Xehetar” në rrethin e formuar ishte prezent edhe vetë Kurti, siç mund ta shihni në videon më poshtë.
“Ooo Trepça jone. Bashkë me kryeministrin. Po, po. Ju bëjmë krenarë”, ka shkruar klubi mitrovicas në Facebook.
Natyrisht, kjo nuk do të thotë se kryeministri bëri tifo për ndonjërin prej ekipeve finaliste të Kupës.
Përndryshe, Trepça e mundi ekipin Besa Famgas me rezultat 40:39, ndërsa fituesi u përcaktua vetëm pas gjuajtjes së 7 metërshave (penalltive).
Trepça e fitoi trofeun e Kupës pas pritjes prej 21 vjetësh.