Mbrojtësi i Zuerichut, Mirlind Kryeziu është përjashtuar me karton të kuq për ndërhyrje të ashpër ndaj sulmuesit të Young Boysit, Kastriot Imeri. Ndeshja Young Boys – Zuerich u zhvillua të dielën, ndërsa përfundoi baras 2:2.
Kryeziu u ndëshkua me karton të kuq në minutën e 91-të. Mediumet në Zvicër raportojnë për ndërhyrje të rëndë të mbrojtësit të Kosovës ndaj sulmuesit të Zvicrës. “ishte faza e fundit e ndeshjes mes Young Boys dhe Zuerichut.
Mirlind Kryeziu rrëzoi brutalisht Kastriot Imerin dhe mori karton të verdhë. Pastaj erdhi sinjali nga dhoma e VAR-it dhe gjyqtari Lukas Fahndrich ndryshoi vendim duke e ndëshkuar Kryeziun me karton të kuq. Kishte një shqetësim të madh për lojtarin e Young Boysit. Ai u shtri në tokë me fytyrë të shtrembëruar nga dhimbja dhe mjekët vrapuan në fushë. Imeri pas disa minutash vazhdoi lojën”, shkruan “20 Minuten”.
Imeri në fushë u inkuadrua në minutën e 81-të. Për Zuerichun në pjesën e parë luajti edhe Bledian Krasniqi. Lindrit Kamberi u inkuadrua në pjesën e dytë. Për kampionin e Zvicrës, Young Boysin ishte pika e parë nga katër ndeshje të zhvilluara. Është në vendin e fundit, kurse Zuerichu ka shtatë pikë nga tri ndeshje.