Trajneri legjendar i xhudos, Driton Kuka, e ka komentuar humbjen e Kosovës nga Rumania në futboll, teksa ka bërë thirrje që ekipi të përkrahet edhe kur është në ditë të keqe.
Kosova u mposht nga Rumania 3:0 të premten në Prishtinë në ndeshjen e parë të edicionit të ri të Ligës së Kombeve. Pas përfundimit të ndeshjes, tifozët nisën të fishkëllejnë lojtarët dhe brohorisnin “Marre, marre”.
Por Kuka ka thënë se sporti duhet të merret me sportivitet. Sipas tij, Rumania kishte nivel tjetër krahasuar me Kosovën dhe se ekipi duhet të përkrahet edhe më shumë në sfidat e radhës.
“Për një ditë të mirë… Sportin merreni me sportivitet! Rumania realisht aq sa unë e pash kishte nivel tjetër të ekipit në raport me futbollistët tanë. Fituan me meritë. Ne si popull e dojmë sportin e sidomos futbollin por të jemi real me mundësitë e ekipit! Loja e ekipit tonë ishte e dobët ska fjalë,skuptoj shumë në pjesën e strategjisë e taktikës në futboll por mbramë diçka shkoj huq. Sportistët tanë e ekipi në përgjithësi duhet përkrah kur janë në ditë të keqe e jo ndryshe! Ti përkrahim edhe më shumë në sfidat e ardhshme”, ka shkruar Kuka në Facebook.