Kupa e Kosovës rikthehet në aksion sot me ndeshjet e kthimit gjysmëfinale.
Katër skuadra do të zbresin në fushë me të vetmin qëllim, të sigurojnë një biletë për finalen e madhe të Kupës së Kosovës.
Gjilani dhe Prishtina janë nikoqir të Llapit respektivisht të Vushtrrisë me dy skuadrat vendase që morën fitoren dy javë më parë në fushat e kundërshtarëve.
Padyshim që vëmendja kryesore do të jetë në stadiumin me bari sintetik në Gjilan, ku të besuarit e Zekirija Ramadanit presin Llapin.
Gjilani ka marrë fitore të madhe 1-2 në ndeshjen e parë dhe synon që sot mos të humbas për të kaluar në finalen e madhe pas 20 viteve pritje.
Në anën tjetër Llapi nuk është dorëzuar pasi udhëton në Gjilan për përmbysjen e madhe dhe të shkoj për herë të tretë radhazi në finale, ku dy të kaluarat i ka fituar.
Ndeshja tjetër do të zhvillohet në kryeqytet me Prishtinën që është nikoqir i Vushtrrisë.
Kryeqytetasit triumfuan në ndeshjen e parë me rezultat 2-1 dhe kërkojnë një tjetër triumf. Në anën tjetër Vushtrria synon që të bëjë mrekullinë në ‘Fadil Vokrri’ për të kaluar në finale.
Të dyja sfidat e ditës së sotme fillojnë nga ora 15:00.