Vetëm një ditë pushim, Albi Mall Superliga e Kosovës në futboll kthehet në aksion.
Drita, që është lidere aktuale në elitën e futbollit kosovar, të shtunën do të ballafaqohet me Ferizajn. “Intelektualët”, synojnë të kthehen tek fitorja pas disfatës në shtëpi nga Prishtina, 1-2. Ky duel është ndërmjet vendit të parë dhe të fundit në tabelë. Sfida mes tyre zhvillohet nga ora 13:00 në kanalin sportiv të platformës Artmotion, Sport2.
Në të njejtën ditë dhe kohë, ndeshje interesante do të zhvillohet në stadiumin “Fadil Vokrri”. Prishtina e mirëpret ekipin e Llapit në kryqeytet.
Sfidë e nxehtë do të zhvillohet edhe në stadiumin “Riza Lushta” në Mitrovicë. Trepça ’89, pas disfatës nga Ballkani, e kërkon medoemos fitoren në xhiron e 13-të, ku për kundërshtar e ka Gjilanin i cili poashtu në javën e 12-të u mposht në shtëpi nga Drenica. Ky takim do të transmetohet të dielën direkt në Klan Kosova, nga ora 13:00.
Në ditën e dielë, janë edhe dy ballafaqime tjera interesante.
Nga ora 13:00, Drenica në stadiumin “Bajram Aliu” e pret ekipin e Malishevës e cila është e motivuar pas triumfit të fundit ndaj Ferizajt me rezultat të thellë, 0-6.
Kurse, ndeshja që e mbyll xhiron e 13-të do të zhvillohet në Klinë. Aty, Dukagjini e pret kampionin aktual, Ballkanin, i cili synim e ka veç fitoren pasi hap pas hapi po i afrohet kreut të tabelës.